Asalaman ka Sastra Madura

Are ganeka saestona banne kaula se etunju' daddi pemateri, tape Andi Law, enggi paneka Andi se pajat lawyer aleas pengacara, manabi kaula lakar na'-kana', ban lebur akompol sarta ro'-noro' babang. Melana takerjat bakto Sahabat Imam nyebbut kaula acareta maemot sastra madura. 

Pangara are ganeka pon ta' entara ka acara ansor, asabab ampon arencana entara nyapot oreng sake' e mekkasan, namong burung, nape pole jat sapedha motor kadhang dhateng sake'na. Enggi pas mator cangkolang ka taretan Imam, sopaja bisa nebeng aleas akentel. Napa pole jat lakar ta' oneng ka tempadda. Nyamana bai reng anyar.

Enggi se patot ekagali lakar bila entar ka ansor neka se daddi korang semangat saestona banne napana, jalanna, arosagan kakabbi, tengnga potonga!!! Katon tadha' Gunana badha bakkel dhari NU. Masthena lakar pengaspalan jalan neka daddi prioritas utama.

Dhari temor mangkat abareng ketua MDS RA, tadz Hasan, namong kaula gi' nyepper fotocopy daddina apesa, tadz Hasan ngone'e ketab Rawatib (pateppa' gaes) ban absen. Kaual sareng imam ngantos e ojek Nara, seddi'na pamandhiyanna motor. E group pon gariyung atanya jalan, tempat ban laen samacemma. Badha se pon rabu. ta' oneng nyamana. Bakto apanggi ternyata asmana ustadz Sya'rani.

Ustadz Sya'rani nyeppowe pamaosan Rawatib kantos du'a (doa), esambut kalaban Sahabat Imam, apareng oneng ja' sahabat Andi Law dhalem kabadha'an songkan, tor ta' bisa epaksa'agi kaangguy kalowar dhati dalemma. Saenggana forum epasra'agi ka kaula, Mat Tor sareng ustadz Firdaus.

Bakto ganeka Tadz Firdaus adungngeng masala tana se kadaddiyan monggu masyarakat Tapakerbuy Gerse' Pote Gappora. Lastare Tadz Firdaus epaterros kalabaan Jajarbaan Sastra Madura. 

Adungngeng Sastra Madura tor basa madura eadha'na masyarakat madura saestona padhana se abujai sagara. Sabab basa madura aneka pajat basana oreng madura dibi'. Masthena ta' aserro sara dhalem maos sastra madura. Bakto ganeka kaula coma adungngeng sakone' badhana Majala Jokotole se ampon ngombar dhukale dhalem sataon. Radar Madura se ampon istiqomah sabban ahad makalowar sanja' tor carpan basa madura. Enggi samangken badha lalampan.com.

Sastra toles basa madura tantona ta' locot, ta' nyengla dhari bangaseppona, se aropa'agi sastra lesan, akadiya parebasan, pantun, bangsalan, saloka, rora basa, kantos kakanten ban en-laen epon. Jugan badhana ejaan se bannya' eguna'agi antara 1973 tor 2011 (bisa epareksane e lalampan.com).

Samangken ampon bannya' buku-buku sastra madura, molae dhari karyana Lukman Hakim A.g: Sagara Aeng  Mata Ojan, Oreng-Oreng Palang, Cengkal Burung tor Tang Bine Majembar Ate. Karya epon Mat Toyu: Embi' Celleng Ji Monentar, Kerrong ka Omba', Sokana tor Ngejung. Karya epon N Shalihin Damiri: Lanceng Talpos tor Salbut. Karya epon Zainal Abidin Hanafi: Esarepo Bencong tor Bajing Tana. Ach Jazuli Odhi' ban Ta-caretan tor AH Hasmidi: Damar Kambang. Tor pan-saponapan se badan kaula ta' hapal.

By : Mat Toyu*

*Pengurus PAC Baanar Pragaan Sekaligus author  Website Lalampan.com